Aktuelnosti
gradkulture.me
gradkulture.me
Mladi i talentovani momak iz grada pod Trebjesom, uspješno gradi svoju karijeru u svijetu košarke. Reprezentativac svih mlađih kategorija, kao i član seniorske B reprezentacije Crne Gore na internacionalnim turnirima u Kini. Može se pohvaliti da je bio dio velikih svjetskih košarkaških klubova. Igor je igrao na Loyola University u Čikagu , španskom San Pablo Burgosu i Al Ittihadu iz Saudijske Arabije.
Zbog čega baš košarka? Kada se pojavljuje ljubav prema ovom sportu?
Još kao dijete sam volio da pratim košarkaške utakmice sa svojim ocem, bila mi je zanimljivija od drugih sportova. Vremenom se pojavila i želja za treniranjem, a sa godinama je sve to išlo ozbiljnijim putem, da bi već ove godine trebalo da odigram svoju osmu profesionalnu sezonu.
Photo by: Privatna arhiva
U dresu kojeg tima si tada sebe zamišljao, da li se sjećaš?
U tom periodu je Beogradski Partizan bilježio velike uspjehe u evropskoj košarci. Za mene je svaka njihova utakmiica djelovala kao praznik. I dan danas sam veliki navijač tog kluba, a kao mali sam sanjao da obučem njegov dres.
Ko ti je od samog početka najveća podrška? S druge strane, da li si nailazio na sujetu?
Najveća podrška je naravno porodica. Bavljenje sportom je specifično, čovjek je često odsutan od kuće. Živio sam daleko , ali uz bezuslovnu podršku porodice, sve se lakše pregura. Što se tiče sujete, bilo je i nje, i to tamo gdje sam najmanje očekivao, u svom gradu, ali i to je neki sastavni dio života i bavljenja košarkom.
Sa tvoje 24 godine postigao si jako pohvalane rezultate u karijeri. Da li si se kao dječak nadao ovom uspjehu?
Na samom početku nisam očekivao ovoliko, međutim, kako je vrijeme prolazilo, ukazivale su se šanse. Neke sam iskoristio, neke ne. Smatram da mogu još dosta da postignem, a za to je potreban veliki rad i odricanje, na šta sam spreman.
Photo by: Privatna arhiva
Igrao si na Loyola University u Čikagu , španskom San Pablo Burgosu i Al Ittihadu iz Saudijske Arabije. Šta su te ti timovi naučili?
Svaka priča nosi određeno iskustvo. U svakom klubu u kojem sam igrao, naučio sam dosta toga, kako košarkaški tako i životno. Upoznao sam i veliki broj ljudi sa kojima sam i dan danas u kontaktu, zbog čega mi je posebno drago.
Bio si član seniorske B reprezentacije Crne Gore na internacionalnim turnirima u Kini. Kakve su impresije?
Biti dio reprezentacije je nešto ka čemu teži svako ko se bavi nekim sportom. Što se tiče turnira u Kini, to je jedno lijepo iskustvo. Upoznavanje drugih zemalja i kultura su samo benefiti, ali svakako da je najljepši osjećaj predstavljati svoju zemlju u inostranstvu na najbolji mogući način. U međuvremenu sam se našao i na spisku A reprezentacije, što mi je dalo podstrek za još veći rad i nadu da cu obući i dres A selekcije.
Photo by: Privatna arhiva
Možeš li izdvojiti neku utakmicu na koju si posebno ponosan?
Utakmica koju ću sigurno pamtiti je iz sezone kada je Sutjeska nastupala u ABA ligi, na gostovanju u Sloveniji protiv Krke. Dobio sam priliku da igram, iskoristio je, odigrao dobro. Još veću težinu dobija zbog činjenice da smo u tom trenutku bili otpisani od svih, a na kraju smo pobijedili.
Za kraj, gdje vidiš sebe za nekih deset godina?
To je dug period u kojem se može izdešavati mnogo stvari, ali svakako i tada sebe vidim u košarci, čak i nakon igračke karijere. To je put koji sam izabrao kao mlad čovjek, tu sam se pronašao i definitivno ću ostati na njemu, u kojoj ulozi, vidjecemo.
Jelena Mitrović, Grad kulture
email: grad.kulturenk@gmail.com
tel: +382 67 415 794